Coma a cada còp qu’òm fa quicòm, òm s’expausa al risca d’agradar pas a totes, e nautres a l’Occitan pels Nulasses aquel risca o assumissèm completament. E sèm nafrats de vos pas agradar Sénher DE Gavaudan.

Assumissèm tanben tot un fum de causas e d’en primièr la nòstra « linha editoriala » qu’o avètz plan comprés es de faire « l’occitan pels Nulasses », valent a dire un descobèrta subjectiva de nòstra vision de l’occitan adrèiçat a totes, e quitament a aqueles que non parlan la lenga nòstra. O podètz regretar, rai, mas sèm fòrça estacats a aquela causida e cambiarem pas res.

Per çò qu’es de la pietra qualitat del nòstre parlar, benlèu, car sénher DE Gavaudan, cal crèire que sètz pas pro Nulàs per nivèl deplorable d’aquesta miserabla emission (nivèl qu’assumissèm completament un còp de mai). En signe de peniténcia nos farem, lo Joan e ieu coma a l’escòla un brave centenat de linhas de punicion « Je n’escagasserai pas la langue du grand Mistral, du grand Lafont et du non-moins grand DE Gavaudan ».
Vos mercegi e vos feliciti pasmens per aquela remarca constructiva, pas brica paternalista, nimai donaira de leiçon qu’efectivament refleita plan la toleréncia granda qu’òm tròba encara en cò dels nòstres galhard occitanISTAS de la segonda mitat del sègle XX, dignes eiretièrs de la civilizacion del Paratge! Òsca sénher DE Gavaudan!
En umille signe justificacion, vos rapelarai tanben, mas segur, qu’aquò aurà pas escapar a un esperit tan aluserpit coma lo vòstre, car sénher DE Gavaudan, que lo preposicion « Per » significa POUR e PAR (se me cresètz pas, e un òme sabi coma o sètz segurament, a pas brica de rason de crèire un jove cretin coma ieu, verificaretz dins lo diccionari de Sant Alibèrt pagina540); Assumissèm doncas completament d’èsser de Nulasses que parlan als Nulasses, sens se prene al seriós, sens voler donar cap de leiçon, sens presicar la Bona Paraula, mas benlèu que los sabentasses qu’an de particulas de lors pseudonims comprènon gaire aquò… Segur que dins vòstra granda sabiessa, sénher DE Gavaudan, nos sauprètz donar l’absolucion, mas crèsi que vau perseverar dins la nulitat encara qualque temps « Nulasses de tout les pays, Unissez vos! »

Espèri qu’avètz notada l’aplicacion emplegada a l’escrich. Nòti dins mon costat que vòstre post s’acaba per l’expression « Bon trabalh », Sénher DE Gavaudan, mèfi de pas encoratjar la Nulitat! Legissi aquela remarca un pauc coma las remarcas que metiá un còp èra mon professor de Letras sus mas còpias d’escolan de 4ena « De grosses lacunes, mais cela reste encourageant ». Còpias qu’immacablament acabavan en avion de papièr sul qual dessinhavi un babau enòrme abans de los mandar per la fenèstra jols uèlhs esblaugits de mos camaradas que se cogostavan d’agacahar ma còpia transformada en Vie-volant malgrat los encoratjament del professor. L’imatge es pesuc e pas tarrible, o vos acòrdi, mas onèstament los bons e marrits punts que nos atribuatz meritan benlèu pas melhor.

Amb totas nòstras mediòcras pasmens respectuosas salutacions Sénher DE Gavaudan.

Arnaud DEL’occitan pels NULASSES

Bon trabalh